| Gracias compañeiro Fidel: é a hora de berrar ¡revolución! |
|
A XC, desde a tranquilidade de que os valores da Revolución Cubana permanecerán inalterados tras a noticia pública da renuncia do compañeiro Fidel Castro Ruz a permanecer en primeira liña da vangarda revolucionaria do pobo de Cuba, manda un afectuoso saúdo ao home que durante máis de medio século encabezou os soños de independencia, soberanía e construción do poder popular nesa pequena illa situada a noventa millas do país que desenvolveu o imperialismo máis salvaxe coñecido pola humanidade. Igualmente condenamos as declaracións de todos aqueles que intencionadamente coñecedores da simpatía do pobo español por Cuba, tratan de comparar a criminal e xenocida ditadura de Franco co socialismo cubano. Non é comparable os indubidables logros en materia de educación, saúde, dereitos políticos e sociais, mostras de solidariedade cos países empobrecidos polo imperialismo, cos miles de fusilados, torturados e exiliados por un réxime que sumiu ao pobo español nun gran atraso cultural e económico; nótase que o vago exercicio de memoria histórica realizado comeza a deixar pegada nalgún destes "intelectualoides". Esiximos o respecto da comunidade internacional ao pobo de Cuba como único dono do seu destino e como os únicos capaces de decidir o modelo social e político no que queren desenvolver a súa vida á vez que admiramos con simpatía os logros deste nobre pobo, que a pesar do criminal bloqueo económico ao que se ve sometido foi capaz de achegar á súa poboación cotas inusitadas de benestar social e desenvolvemento sostido como o mellor legado para as futuras xeracións. Como mostra de solidariedade e do internacionalismo proletario que define os nosos valores comunistas manifestamos a nosa intención de redobrar a nosa actividade para trasladar á sociedade española os nobres valores do pobo cubano e o papel de vangarda que este xoga nos procesos de liberación nacional que se dan no Latinoamérica como alternativa ao modelo neoliberal, conscientes de que o socialismo é a única vía posible para acabar coas desigualdades sociais. |
